კახეთსა და სამეგრელოში რეგიონული სანიტარული ნაგავსაყრელები აშენდება

საქართველოს რეგიონული განვითარებისა და ინფრასტრუქტურის სამინისტროში მყარი ნარჩენების ინტეგრირებული მართვის პროგრამის შესახებ იმსჯელეს. პროექტი კახეთისა და სამეგრელო-ზემო სვანეთის რეგიონული სანიტარული ნაგავსაყრელის მოწყობას და ინტეგრირებულ მართვას ითვალისწინებს. ინფორმაციას რეგიონული განვითარების სამინისტრო ავრცელებს.

პროგრამის შესახებ მსჯელობა სამინისტროში გაიმართა, რომელსაც გერმანიის რეკონსტრუქციის საკრედიტო ბანკის (KfW ) სამხრეთ კავკასიის რეგიონული ოფისის დირექტორი, კლაუს ვეიგელიც ესწრებოდა.

სამინისტროს ინფორმაციით, სანიტარული ნაგავსაყრელების პროექტისთვის ტექნიკურ-ეკონომიკური კვლევები უკვე გაკეთდა.

გეგმის თანახმად, მოეწყობა ახალი, ევროსტანდარტების შესაბამისი, რეგიონული სანიტარული ნაგავსაყრელი, აშენდება გადამტვირთი სადგურები და კომპოსტირების პილოტური ქარხანა. პროექტი ასევე ითვალისწინებს დასუფთავების მანქანების შეძენასა და არსებული ნაგავსაყრელების დახურვას.
პროექტის დასაფინანსებლად გერმანიის რეკონსტრუქციის საკრედიტო ბანკი 30 მილიონ ევროს გამოყოფს.

Comments

comments